In memoriam Maria

Dialekauteur Maria Scheres gestorve

Maria Scheres (Riekelt 1949) is op maondag 26 fibberwarie in häör kraankbèd gestorve. Ze kaom oet Riekelt, woende in Mestreech en sjreef ouch in allebei die dialekte. Ze publiceerde twie verhaoleboondels, (Sjoorpepier en Sp(r)ookverhaole) die allebei zien versjene in de LiLiLi reeks.

Soms komisch, soms tragisch meh altied deep minselek en reurend, zoe maag me häöre sjriefstijl typere. Mèt häör verhaol Opruime wón zie in 2005 de Veldeke Literatuurpries.

Maria Scheres traoj dèks op bij dialekaovende. Häör lèste gediech versjeen in Platbook 18 mèt es thema “Dinkend aon Limburg”, wat pas geleie geprizzenteerd is. Ze liet dat gediech op ’n subtiel meneer oetmónde in ’n ode aon häör geboortedörp Riekelt.

Riek

Es iech aon Limburg dink
Zeen iech ’n zie
Van kleurige, fleurige golve.
Riek!

Platte golve op us zanderige duine
Mèt hun witte goud
Die opgezwjiep weurde tot ‘ne störmachtige tsunami
opgestuwd,
Tot pókkele en berg mèt buimhoeg bosse
Riek!

In de geologische koorste vaan ies en vuurstein
ligke oonbetaolbaar sjatte van zjwart goud
en skelette van prehistorische oerbieste
besjermp door zachte mergel.
Riek!

Es iech aon Limburg dink
weur iech euverspeult door de kakofonie
Van us dialeksymphonie
begeleid door houte en kopere klaanke.
Riekelt!

========================================================================

Colla Bemelmans haet dit in memoriam oetgesjpraoke:

In Memoriam  Maria

Maria waor al 22 jaor lid van ózze Veldeke dialekt sjrieverskrink; sjrievers oet gans Limburg die ós ins per maond treffe.
En sjrieve kós ze. Zie sjrieëf e paar beuk mit verhaole, ó. a. sp(r)ookverhaole en Sjoorpepier. Zie vertaalde mit aan Donald Duck in ’t plat en publiceerde gedichte in oos sjrieverskrinkbeuksjkes.
Dat alles woert bekroeënd mit de Veldeke Literatuurpries. Ouch sjtónt gedichte en verhaole van häör in Platbook. ’t Lètste gedich van häör sjtóng dit jaor nog d’rin, wie krank ze ouch waor.
Häör verhaole getuugde van ’n groeëte opmerkingsgave, oug vuur detail. Meh häör gedichte waore van ’n intens geveul vuur sjoeënheid, sjilderiekes vuur in te lieste.
Meh mieë is ós biegeblieëve häör respekt vuur ’t sjrieve van angere en de zachte kritiek van häör op ós werke. Want vuur ós waor zie ’n zachte vrouw die good mitkalde en veulde uuever de belangrieke dinger van ’t laeve, ze debatteerde en sjaterde mit en vreuger roukde ze achteraaf e cigarètje. Zie waor geine revolutionair die mit sjpandeuk leep, meh sjrieëf gedichte-gedachtes uuever blome, sjnieë of es ieëmes sjtórf, de Maas. Vier waore ‘ne vriendekring gewoere.
Vier zint es sjrieverskrink aafgeloupe zaoterdig biejein gekómmeen höbbe uuever häör gekald, gelache en gegrieëne. De eine zag: ’t Lache is ós vandaag vergange, we höbbe ós altied good verstange”. “ne angere: Verjaese dunt v’r diech nit, vuur diech tselt alling nog rouw en vrid”. Vuur de Mestreechtenaere ónger ós: rouw en vrid is rust en vrede. Ich zèk dit op dezelfde toeën es woeë op Maria zach ironis kalde uuever Mestreechtenaere. Angere herinnerde zich de lètste kaesjkaart woeë zie sjrieëf: meh behoud uch ideale. Weer angere haolde gedichreigels van häör aan, angere vertèlde dat ze de aafgeloupe daag al häör gedichsjkes nog ins doergelaeze houwe. Vier höbbe helop e weesgegroet vuur häör gebaed mit de naodrök op Weesgegroet  Maria.   Ouch de gezèt, facebook, de Veldeke-site en Wim Kuipers in zien Veldgewas höbbe ier aan häör gebrach.
Es vier häör al zoeë misse wieväöl mieë dan neet Hub Luuk en Karine woeë ze zoeë väöl van heel en gruuetsj uuever kalde, vier kalle allein uuever wat ze vuur ós es sjrieverskrink beteikende; Zie herinnere zich gans anger dinger die väöl belangrieker zint en deper ingriepe in hun laeve.
De sjtool bie ós op ’t opkaemerke is laeg, ’t Hoes bie Hub is laeg, ’t papier blief laeg en ouch ós hart is zjwart. Vier houwte ós óngerein en Hub, Luuk en Karine ’n hand in de rök, ouch al weite v’r : dat hulp mörge pas of uuever e paar maond, want de ergste en leefste dinger wènne neet.
Häör lètste gedich es Riekelts maedje getuugt van häör leefde vuur Limburg en ’t plat: ich zal uch dao e paar reigels oet vuurlaeze:
Riek
Es iech aon Limburg dink  zeen iech ein zie   vaan kleurige fleurige golve
Riek !
Es iech aon Limburg dink   weur iech euverspeuld door de kakafonie
vaan us dialeksymfonie   begeleid door houte en kopere klaanke.
Riek!   Riekelt!
Sjoeën heh.
Adieë Maria.  Bedankt.

Advertenties